RSG Ontbyt 18 Mei 2013_resep

Walliese Roosterbroodontbyt

(bedien 2 )

1 E botter

1 E koekmeel

½ k melk

100 g cheddarkaas, gerasper

2 t korrelmosterd

Hand vol pietersielie, fyn gekap

Sout en swartpeper

4 snye brood

Smelt die botter in ‘n braaipan en roer die meel by. Klits die melk geleidelik by totdat die sous verdik. Roer die kaas, mosterd en pietersielie by. Geur met sout en peper.

Rooster die brood liggies aan albei kante en skep ‘n dik laag kaassous oor. Rooster in die oond tot kaas goudbruin is. Bedien warm met geposjeerde eiers en bros gebraaide varkworsies.

RSG Ontbyt 11 Mei 2013_resep

Ontbyt Jalousie

( bedien 6 – 8 )

Brooddeeg:

25 g gis

340 ml water, louwarm

10 ml sout

10 ml suiker

20 ml olyfolie

500 g broodmeel

Meng die gis en water in ‘n mengbak totdat die gis opgelos is. Roer die sout, suiker en olyfolie by. Voeg die meel gelydelik by en meng tot ‘n stywe deeg Keer op ‘n skoon oppervlakte uit en knie totdat die deeg glad is. Plaas in ‘n bak wat liggies met olie gesmeer is en bedek met kleefplastiek. Laat die deeg reis totdat dit verdubbel in grootte.

Jalousie:

Voorverhit die oond tot 180°C. Spuit ‘n bakplaat met kleefwerende sproei. Rol die brooddeeg in ‘n groot vierkant uit (± 30cm x 30cm). Sprinkel die regterkant van die deeg liggies met meel. Vou dit dan in die helfte tot denkbeeldige middellyn van die deeg en sny dwars kepies in. Vou die deeg weer oop. Skep enige kombinasie vulsel op die linker helfte van die deeg. Laat 2 cm om die rand oop en smeer liggies met water (sal as gom dien).Vou die helfte met die kepies bo-oor die vulsel en seël mooi.

Bedek en laat weer in ‘n warm plek staan tot effe gerys. Verf met eiermengsel en bak vir 20 – 25 minute of totdat die jalousie goudbruin en gaar is.

Vulsels:

Gekookte eier, bros spek, gaar wors in skyfies gesny, gaar skelvis, gebraaide uie, kersietamaties, gekapte pietersielie, beleë Cheddarkaas.

2013 S Pellegrino Top 100

RSG Ontbyt 4 Mei 2013_resep

Ontbyt demperbrood

(maak 1 brood)

8 spekrepies, in blokkies gesny

1 ui, grof gekap

250 g bruismeel

5 ml sout

45 g botter, in blokkies gesny

12, 5 ml grasuie, fyn gesny

140 g beleë Cheddarkaas, gerasper

10 ml witwynasyn

175 ml melk

Voorverhit die oond tot 200°C en spuit ‘n bakplaat met kleefwerende sproei. Braai die spek en uie in ‘n braaipan met ‘n bietjie olie tot gaar.

Sif die bruismeel en sout saam in ‘n mengbak. Vryf die botter met vingerpunte in en roer die grasuie, kaas, spek en uie by. Meng die asyn en melk by en roer die meelmengsel tot ‘n sagte deeg vorm. Indien die deeg te styf is, roer nog melk by. Keer uit op ‘n skoon oppervlakte en knie tot glad. Maak ‘n ronde vorm en plaas op die bakplaat. Neem drie stukke growwe tou en bind die brooddeeg vas om 6 “wiggies” te vorm. Sprinkel elke wiggie met ‘n ander tipe saadjie, bv sesamsaad, poppiesaad, pampoensaad of lynsaad. Bak vir ± 45 minute tot goudbruin, bedek en bak ‘n verdere 15 – 20 minute tot gaar.

RSG Ontbyt 27 April 2013_resep

Eiers “en cocotte” met roosterbrood soldate

(bedien 1)

Eiers ‘en cocotte’

2 eiers

20 ml room

Sout en swartpeper na smaak

Voorverhit die oond na 180°C. Spuit ‘n ramekin of oondvaste bakkie met kleefwerende sproei. Breek die eiers in die houer en sprinkel met sout en swartpeper. Giet die room daaroor en plaas in die oond om te bak vir ongeveer 10 – 12 minute. Verwyder van die oond en laat vir ‘n minuut of twee staan.

Variasie:

Plaas fyn gesnyde spinasie of tamaties onder-in die ramekin. Sprinkel kaas bo-oor en laat smelt.

Roosterbrood-soldate:

1 sny brood, korsies afgesny

25 g botter

Paar takkies tiemie

Sny die brood in 3-4 repe. Verhit ‘n braaipan en smelt die botter daarin. Voeg die tiemie by en daarna die brood. Braai tot goudbruin aan albei kante.

Bedien warm met die eier ‘en cocotte’.

FIRST CLASS OF 2013 TAKES PLACE ON 29 APRIL
BOOKINGS ESSENTIAL – LIMITED SPACE AVAILABLE

RSG Ontbyt 20 April 2013_resep

Lewerkoekies met tamatieblatjang

(Bedien 4)

1 ui, fyn gekap

400 g lam, skaap of bees lewer

8 repies spek, opgesny

2 eiers, geklits

2 E asyn

½ k vars broodkrummels

2 E pietersielie, fyn gekap

Sout en gemaalde swartpeper na smaak

Olie vir braai

Braai die ui in ‘n braaipan tot deursigtig en sag, laat afkoel. Sny die lewer in kleiner stukkies en voeg saam met die ui in voedselverwerker, verwerk tot fyn. Skep in ‘n mengbak en voeg die res van die bestanddele by. Geur met sout en swartpeper en meng deeglik.

Verhit die olie in ‘n braaipan en braai tot goud-bruin aan albei kante.

Bedien met tamatieblatjang.

Tamatieblatjang

900 g tamaties, grof gekap

1 ½ k rosyntjies

2 uie, fyn gekap

1 k strooisuiker

2 ½ k moutasyn

Plaas die tamaties, rosyne, uie en strooisuiker in ‘n kastrol. Giet die asyn oor die tamaties en bring tot kookpunt. Verlaag die temperatuur en prut vir ongeveer 2 ure of totdat die megsel verdik het.

Bedien dadelik of stoor in gesteriliseerde flesse in die yskas.

RSG Ontbyt 13 April 2013_resep

Muesli-flappertjies met gestoofde vrugte

(maak ± 24)

2 k koekmeelblom

50 ml ( ¾ k) suiker

1 e bakpoeier

Knippie sout

2 eiers, geklits

2 ½ k melk

50 g botter, gesmelt

1 k geroosterde muesli

Botter vir braai

Meng die meel, suiker, muesli, bakpoeier en sout in ‘n mengbak. Voeg die eiers, melk en gesmelte botter by die droë bestanddele en klits tot ‘n gladde beslag.

Verhit die botter in ‘n braaipan tot matige hitte en skep lepels vol van die beslag daarin. Sodra die opppervlak van die flappertjies klein borreltjies maak, draai om en braai verder tot gaar.

Gestoofde vrugte:

2 k gedroogde vrugte

¾ k suiker

Kaneelstokkie

1 rooibosteesakkie

5 ml suurlemoensap

Was die droë vrugte goed af. Plaas in ‘n kastrol met die res van die bestanddele en bedek met water. Prut vir 10 – 15 minute of totdat die droë vrugte sag is.

Bedien die flappertjies met gestoofde vrugte en vars jogurt.